ކުށްމަދު އަމާން މާހައުކެއް ގާއިމު ކުރުމަށް ފުލުހުން ކުރަމުންދާ މސައްކަތްތަކުގެ ތެރެއިން، ލ. ގަނ ޕޮލިސް ސްޓޭޝަނާއި އިންޓެލިޖެންސް ގުޅިގެން ހިންގި އޮޕަރޭޝަނެއްގައި ގަމު، ތުނޑިއަވަށުގެ ގެއެއް ބަލައިފާސްކޮށް މަސްމަރާ ބަނޑިއެއް ހޯދައި ފުލުހުންގެ ބެލުމުގެދަށަށް ގެނެސްފިއެވެ.

މަސްމަރާ ބަޑިއެއް ގެންގުޅޭކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން އެގޭގައި ހުރި ގަރާޖު ކޯޓު އަމުރެއްގެ ދަށުން މިއަދު ބަލައިފާސްކުރިއިރު، އަމިއްލައަށް ހަދާފައިވާ މަސްމަރާ ބަޑިއެއް ފެނިފައިވެއެވެ.

މަސް މަރާ ބަޑިއަކީ ޤާނޫނު ނަމްބަރު 75/4 ގެ ދަށުން، ހުއްދަ ނެތި ރާއްޖެ އެތެރެކޮށް ގެންގުޅުން މަނާ އެއްޗެކެވެ.

މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ.

މި މައްސަލަ ލ. ގަން ޕޮލިސް ސްޓޭޝަނުން ދަނީ ތަޙުޤީޤު ކުރަމުންނެވެ.

މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން، ޑްރަގް އެންފޯސްމަންޓް ޑިޕާޓްމަންޓާއި އިންޓެލިޖެންސް ގުޅިގެން ހިންގި އޮޕަރޭޝަނެއްގައި މާފަންނު ގެއެއް ބަލައިފާސްކޮށް މަސްތުވާތަކެއްޗާއެކު މީހަކު ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރު ކޮށްފައިވަނީ 24 އަހަރުގެ ދިވެހި ފިރިހެނެކެވެ. މަސްތުވާތަކެތި ގެންގުޅޭކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން މިއޮކްޓޯބަރު މަހުގެ 14 ވަނަ ދުވަހު ހިންގި މި އޮޕަރޭޝަނުގައި އޭނާ ހައްޔަރުކޮށް އެ ގެ ބަލައިފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައިހުރި ފިލްމު ހުސްކުރި ދަޅެއް ފެނިފައިވެއެވެ.

މިމައްސަލައާ ގުޅިގެން އޭނާގެ ބަންދާމެދު ގޮތެއްނިންމުމަށް ކްރިމިނަލް ކޯޓަށް ހާޒިރުކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 10 ދުވަހުގެ މުއްދަތު ދީފައިވެއެވެ.

މި މައްސަލަ ޑްރަގް އެންފޯސްމަންޓް ޑިޕާޓްމަންޓުން ދަނީ ތަޙުޤީޤުކުރަމުންނެވެ.

މޯލްޑިވްސް ޕޮލިސް ސަރވިސްގެ  2019 ން 2024 އަށް އެކުލަވާލައިފައިވާ ސްޓްރެޓިޖިކް ޕްލޭންގެ ރޯޑް އެންޑް މެރިޓައިމް ޕޮލިސިންގައި އެކުލެވޭ ކަންތައްތަކުގެ ތެރެއިން ތާޖުއްދީން ސްކޫލުގެ ދަރިވަރުންނަށް ކުރިއަށް ގެންދިޔަ 'ޓްރެފިކް މޮނިޓަރސް ޕްރޮގްރާމް' ނިންމުމުގެ ރަސްމިއްޔާތު ބާއްވައިފިއެވެ.

މިހިނގާ އޮކްޓޯބަރު މަހުގެ 15 ވަނަ ދުވަހު ބޭއްވި މިރަސްމިއްޔާތު ޝަރަފުވެރިކޮށްދެއްވީ އެސިސްޓަންޓް ކަމިޝަނަރ އޮފް ޕޮލިސް ޢަބްދުﷲ ޙަމީދެވެ. މި ރަސްމިއްޔާތު ޝަރަފުވެރި ކޮށްދެއްވައި ޢަބްދުﷲ ޙަމީދު ދެއްކެވި ވާހަކަފުޅުގައި، ސަލަމާތާއި ރައްކާތެރިކަމަށްޓަކައި ކުރެވިދާނެ ކަންތައްތައް މި ޕްރޮގްރާމުގައި ދަރިވަރުންނަށް ކިޔައިދީފައިވާނެ ކަމަށާއި، ޕްރޮގްރާމުން ދަސްވި އެއްޗެހި އަބަދުވެސް ހަނދާނުގައި ބެހެއްޓުމަށް ދަރިވަރުންނަށްގެ ކިބައިން އެދިލެއްވިއެވެ. އަދި ޕްރޮގްރާމް ނިމިގެން ދިޔައިރު ދަސްވި އެއްޗެހި ރައްޓެހިންނަށާއި އާއިލާގެ މެންބަރުންނަށް ކިޔައި ދިނުމަށްވެސް އެދިލެއްވިއެވެ. އަދި މި ޕްރޮގްރާމު ކުރިއަށް ގެންދިއުމަށް ސްކޫލުގެ މެނޭޖްމަންޓުން ދެއްވި އެއްބާރުލުން ފާހަގަކޮށް އެކަމަށް ޝުކުރު އަދާކުރެއްވިއެވެ.

މި ރަސްމިއްޔާތުގައި ޓްރެފިކް މެނޭޖްމަންޓް ޑިޕާޓްމަންޓްގެ ހެޑް، ސްޕްރިޓެންޑެންޓް އޮފް ޕޮލިސް ހުސައިން ސަމީރާއި ޑެޕިއުޓީ ހެޑް، ޗީފް އިންސްޕެކްޓަރ އޮފް ޕޮލިސް ހަސަން ޝަހީމްގެ އިތުރުން ޓްރެފިކް ޑިޕާޓްމަންޓްގެ ޔުނިޓުތަކުގެ އިސްވެރިންނާއި ތާޖުއްދީން ސްކޫލުގެ އިސްވެރިން ބައިވެރިވެލެއްވިއެވެ.

ޓްރެފިކް މެނޭޖްމަންޓް ޑިޕާޓްމަންޓާއި ތާޖުއްދީން ސްކޫލް ގުޅިގެން، މިދިޔަ ސެޕްޓެމްބަރު މަހުގެ 22 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށް ކުރިއަށް ގެންދިޔަ ޓްރެފިކް މޮނިޓަރސް ޕްރޮގްރާމްގައި އެސްކޫލްގެ 38 ދަރިވަރުން ބައިވެރިވެފައިވެއެވެ. މިއީ ތާޖުއްދީން ސްކޫލް ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓަރސްގެ ތިންވަނަ ޕްރޮގްރާމެވެ.

މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ހުޅުމާލެ ޕޮލިސް ސްޓޭޝަނުން، ބަނގުރާފުޅި ތަކަކާއެކު ބިދޭސީއަކު ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ 23 އަހަރުގެ ބަނގުލަދޭޝް މީހެކެވެ. އޮކްޓޯބަރ 16 ވަނަ ދުވަހުގެރޭ ގާތްގަނޑަކަށް 19:52 އެހާކަންހާއިރު ހުޅުމާލެ ޕޮލިސް ސްޓޭޝަނުގެ ފުލުހުން ހުޅުމާލެތެރެ ޕެޓްރޯލް ކުރަމުންދިޔައިރު ދަބަހެއް ހިފައިގެން އުޅުނު އެމީހާ ހުއްޓުވައި ފުލުހުންގެ ބެލުމުގެދަށަށް ގެނެސް ބަލައިފާސްކުރި އިރު އޭނާ ގެންގުޅުނު ދަބަހުގެ ތެރެއިން ހަ ފުޅި ބަނގުރާ ފެނިފައިވެއެވެ.

މި މައްސަލަ ހުޅުމާލޭ ޕޮލިސް ސްޓޭޝަނުން ދަނީ ތަޙުޤީޤު ކުރަމުންނެވެ.

ކާށިދުއަކީ ކުށްމަދު އަމާން ރައްކާތެރި ރަށަކަށް ހެދުމަށްޓަކައި ކ. ކާށިދޫ ޕޮލިސް ސްޓޭޝަނުން އިސްނަގައިގެން ކާށިދޫ ކައުންސިލާއެކު މަޝްވަރާ ބައްދަލުވުމެއް ކުރިއަށް ގެންގޮސްފިއެވެ.

މިހިނގާ އޮކްޓޯބަރ މަހުގެ 16 ވަނަ ދުވަހު ކުރިއަށް ގެންދިޔަ މި ބައްދަލުވުމުގައި، ކާށިދުއަކީ ކުށްމަދު އަމާންތަނަކަށް ހެދުމަށް ކުރެވިދާނެ ކަންކަމާއި ގުޅޭގޮތުންނާއި މިހާރު ހިނގާ ކުށްތައް ހިންގަން މެދުވެރިވާ ސަބަބުތައް ދެނެގަނެ އެކަންކަން ހުއްޓުވުމަށް ކުރެވޭނެ ކަންކަމާއި ގުޅޭގޮތުން މަޝްވަރާކޮށްފައިވެއެވެ.

މީގެއިތުރުން އިމިގްރޭޝަންގެ ޤާނޫނާއި ޚިލާފަށް ކާށިދޫގައި ދިރިއުޅޭ ބިދޭސީން ދެނެގަނެ ބިދޭސީންގެ ދަފްތަރެއް އެކުލަވައިލުމާއި ގުޅޭގޮތުންވެސް މިމަޝްވަރާ ބައްދަލުވުމުގައި ވާހަކަ ދެކެވިފައިވެއެވެ.

ކާށިދޫ ޕޮލިސް ސްޓޭޝަނާއި ކާށިދޫ ކައުންސިލާއި ކާށިދޫގައި ހުންނަ ސަރުކާރުގެ އިދާރާތައް ގުޅިގެން ކާށިދޫގައި ކުށްމަދުކުރުމަށް ގިނަގުނަ މަސައްކަތް ތަކެއް މިހާރުވެސް ކުރަމުންދާކަން މިބައްދަލުވުމުގައި ފާހަގަކޮށްފައިވެއެވެ.

މިމަޝްވަރާ ބައްދަލުވުމުގައި ކާށިދޫ ޕޮލިސް ސްޓޭޝަންގެ އިސްފަރާތްތަކާއި ކާށިދޫ ކައުންސިލް އިދާރާގެ އިސްފަރާތްތައް ބައިވެރިވެފައިވެއެވެ.

މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ދ. ބަނޑިދޫ ޕޮލިސް ސްޓޭޝަނާއި ފުލުހުންގެ އިންޓެލިޖެންސް ގުޅިގެން ހިންގި އޮޕަރޭޝަނެއްގައި މަސްތުވާތަކެއްޗާއެކު މީހަކު ބަނޑިދޫން ހައްޔަރުކޮށްފިއެވެ.

މާލެއިން ބަނޑިދުއަށް ދަތުރުކުރަމުންދާ ބޯޓަކުން ބަނޑިދުއަށް މަސްތުވާތަކެތި އެތެރެކުރާ ކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގި މިއޮޕަރޭޝަންގައި ހައްޔަރުކޮށްފައިވަނީ 33 އަަހަރުގެ ފިރިހެނެކެވެ.

 އޮކްޓޯބަރު 15 ވަނަ ދުވަހު ހިންގި މިއޮޕަރޭޝަނުގައި ބަނޑިދޫ ބަނދަރު ސަރަޙައްދުން އޭނާ ހުއްޓުވައި ފުލުހުންގެ ބެލުމުގެ ދަށަށް ގެނެސް ބަލައިފާސްކުރިއިރު އޭނާގެ އަތުގައި ހުރި ފޮށިގަނޑެއްގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ރަބަރު ޕެކެޓެއް ފެނިފައިވެއެވެ.

މިމައްސަލައިގައި ހައްޔަރުކޮށްފައިވާ މީހާގެ ބަންދާމެދު ގޮތެއް ނިންމުމަށް ދ. ކުޑަހުވަދޫ މެޖިސްޓްރޭޓް ކޯޓަށް ހާޒިރުކުރުމުން، މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 10 ދުވަހުގެ މުއްދަތު ދީފައިވެއެވެ.

މިމައްސަލަ ދ. ބަނޑިދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.

ކޮމިއުނިޓީ ހެލްޕަރސް ޑޭ ފާހަގަ ކުރުމަށް ޝައިން ލާނަރސް ޕްރީސްކޫލުން ބޭއްވި އިވެންޓުގައި ފުލުހުން ބައިވެރިވެއްޖެއެވެ.

މި ހިނގާ އޮކްޓޯބަރު މަހުގެ 12 ވަނަ ދުވަހު އެ ސްކޫލުގައި ބޭއްވި މިއިވެންޓުގައި ކްރައިމް ޕްރިވެންޝަން އެންޑް ޕަބްލިކް އެފެއާޒް ޑިޕާޓްމަންޓާއި ޓްރެފިކް މެނޭޖްމަންޓް ޑިޕާޓްމަންޓާއި އެންއެސްއޯ ގުޅިގެން ދަރިވަރުންނަށް  ޚާއްސަ ހަރަކާތްތަކެއް ކުރިއަށް ގެންގޮސްފައިވެއެވެ. އަދި ފުލުހުން ކުރާ މަސައްކަތްތަކާ ގުޅޭގޮތުން އެދަރިވަރުންގެ އުމުރާ އެކަށީގެންވާ ގޮތަށް މަޢުލޫމާތު ދީފައިވެއެވެ.

ކަނޑުހުޅުދޫ ސްކޫލުގެ ދަރިވަރުންނަށް މަޢުލޫމާތު ދިނުމަށް ކުރިއަށް ގެންދިޔަ ޕްރޮގްރާމުގެ ތެރެއިން --

ސްކޫލްތަކުގެ ދަރިވަރުންނަށް އެކި ކަންކަމަށް އަހުލުވެރިކުރުވައި ހޭލުންތެރިކުރުމަށް ފުލުހުން ކުރިއަށް ގެންދާ ޕްރޮގްރާމްތަކުގެ ތެރެއިން، އެއްގަމު ދަތުރުފަތުރުގެ ޤާނޫނާ ގުޅޭގޮތުން ގއ. ކަނޑުހުޅުދޫ ސްކޫލުގެ ދަރިވަރުން މަޢުލޫމާތު ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.

އޮކްޓޫބަރު 15 ވަނަ ދުވަހު ކަނޑުހުޅުދޫ ޕޮލިސް ޑެސްކުން ކުރިއަށް ގެންދިޔަ މިޕްރޮގްރާމްގައި، އެއްގަމު ދަތުރުފަތުރުގެ ޤާނޫނާއި ޤަވާއިދުތަކާއި ގުޅޭގޮތުންނާއި މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން މައުލޫމާތު ދީފައިވެއެވެ. އެގޮތުން މަގުމަތީގައި ހިނގާބިނގާވެ އުޅުމާއި ބައިސްކަލު ދުއްވާއިރު ސަމާލުކަންދޭންވީ ކަންކަމާއި އެކްސިޑެންޓެއް ހިނގައިފިނަމަ ދަރިވަރުންނަށް ކުރެވިދާނެ ކަންކަމާ ގުޅޭގޮތުން މަޢުލޫމާތު ދީފައިވެއެވެ.

މިޕްރޮގްރާމުގައި އެސުކޫލުގެ ގްރޭޑް 2 ން 7 އާ ދެމެދު ގްރޭޑްތަކުގައި ތަޢުލީމު ހާސިލްކުރަމުންދާ ހުރިހާ ދަރިވަރުން ބައިވެރިވެފައިވެއެވެ. މި ޕްރޮގްރާމުގައިމައުލޫމާތުދީފައި ވަނީ ގއ. ކަނޑުހުޅުދޫ ޕޮލިސް ޑެސްކުގައި މަސައްކަތްކުރާ ފުލުހުންނެއެވެ.

މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން ފުލުހުންގެ އިންޓެލިޖެންސާއި ޑްރަގް އެންފޯސްމަންޓް ޑިޕާޓްމަންޓް ގުޅިގެން ހިންގި އޮޕަރޭޝަނެއްގައި މައްޗަންގޯޅި ގެއެއް ބަލައިފާސްކޮށް ގިނަ އަދަދެއްގެ ބަނގުރާފުޅި ތަކަކާއެކު ހަތަރު މީހުން ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ 20 އަހަރުގެ ދިވެހި 02 ފިރިހެނުންނާއި 27 އަހަރުގެ ދިވެހި ފިރިހެނަކާއި 24 އަހަރުގެ ދިވެހި ފިރިހެނެކެވެ.

މަސްތުވާތަކެތި ގެންގުޅޭކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން އޮކްޓޫބަރު 14 ވަނަ ދުވަހު ހިންގި އޮޕަރޭޝަނުގައި ކޯޓު އަމުރެއްގެ ދަށުން އެގެ ބަލައިފާސްކުރިއިރު 44 ފުޅި ބަނގުރަލާއި މަސްތުވާތަކެތިކަމަށް ޝައްކުކުރެވޭ އެއްޗެއްހުރި 35 ސެލޯފިންކޮޅާއި މަނާ ބޭހުގެ 04 ގުޅަ ބޭސް ފެނިފައިވެއެވެ.

 މިމައްސަލާގައި ހައްޔަރުކޮށްފައިވާ ހަތަރު މީހުންގެ ބަންދާއިމެދު ގޮތެއް ނިންމުމަށް އޮކްޓޫބަރު 15 ވަނަ ދުވަހު ކުރިމިނަލް ކޯޓަށް ހާޒިރުކުރުމުން މި މައްސަލަ އާއި ގުޅިގެން ހައްޔަރުކުރި ހަތަރު މީހުން ވަނީ ކަފާލާތުގެ އުސޫލުގެ ދަށުން ދޫކޮށްލާފައެވެ.

މި މައްސަލަ ޑްރަގް އެންފޯސްމަންޓް ޑިޕާޓްމަންޓުން ދަނީ ތަހުޤީޤުކުރަމުނެވެ.

މަސްތުވާތަކެއްޗާއި ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ނ.މަނަދޫ ޕޮލިސް ސްޓޭޝަނުން ހިންގި އޮޕަރޭޝަނެއްގައި މަސްތުވާތަކެއްޗާއެކު 18 އަހަރުން ދަށުގެ ކުއްޖަކު ހައްޔަރުކޮށްފިއެވެ.

މިކުއްޖާ ހައްޔަރުކޮށްފައިވަނީ މާލެއިން ނ.އަތޮޅަށް ދަތުރުކުރަމުންދާ ފެރީ ލޯންޗަކުން މަސްތުވާތަކެތި އެތެރެކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނުގައި ކޯޓު އަމުރެއްގެ ދަށުން އޮކްޓޫބަރު 14 ވަނަ ދުވަހުގެ 10:33 އެހައިކަންހާއިރު މާފަރު ބަނދަރު ސަރަޙައްދުންނެވެ.

މިކުއްޖާ ފުލުހުންގެ ބެލުމުގެ ދަށަށް ގެނެސް ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި ބުލެޓް ސައިޒުގެ ދެ ރަބަރު ޕެކެޓް ފެނިފައިވެއެވެ.

މިމައްސަލަ ނ.މަނަދޫ ޕޮލިސް ސްޓޭޝަނުން ގެންދަނީ ތަޙުޤީޤު ކުރަމުންނެވެ.